अमरदीप दगडे (जिल्हा प्रतिनिधी):
नांदेडचे भूमिपुत्र तथा लोकप्रिय भाजपा राज्यसभा खासदार Dr. Ajit Gopchade यांनी 25 मार्च रोजी राज्यसभेत नांदेड जिल्ह्यासाठी अत्यंत महत्त्वपूर्ण ठरणाऱ्या दोन रेल्वे मार्गांना गती देण्याची जोरदार मागणी केली. यामध्ये नांदेड–देगलूर–बिदर आणि बोधन–बिलोली–नरसी–मुखेड ते लातूर रोड या रेल्वे मार्गांचा समावेश असून, या प्रकल्पांमुळे सीमाभागातील विकासाला मोठी चालना मिळणार असल्याचे त्यांनी स्पष्ट केले.
नांदेड–देगलूर–बिदर या रेल्वे मार्गाबाबत बोलताना त्यांनी सांगितले की, या प्रकल्पाचा डीपीआर तयार झाला असून महाराष्ट्र शासनाने 50 टक्के आर्थिक अंशदान देण्याची तयारी दर्शविली आहे. त्यामुळे केंद्र सरकारने कर्नाटक सरकारशी समन्वय साधून हा प्रकल्प लवकरात लवकर मार्गी लावावा, अशी मागणी त्यांनी केली. तसेच बोधन–बिलोली–नरसी–मुखेड ते लातूर रोड या रेल्वे मार्गासाठी केंद्र शासनाने सर्वेक्षणास मंजुरी दिली असून त्याचे काम तातडीने सुरू करण्याची गरज त्यांनी अधोरेखित केली.
या दोन्ही रेल्वे मार्गांचे महत्त्व स्पष्ट करताना खासदार गोपछडे म्हणाले की, नांदेड–देगलूर–बिदर हा मार्ग केवळ रेल्वे प्रकल्प नसून Hyderabad येथील आयटी व फार्मा क्षेत्राला देशाची आर्थिक राजधानी Mumbaiशी जोडणारा एक महत्त्वाचा दुवा ठरेल. तसेच नांदेडमधील कृष्णूर एमआयडीसीला पंचतारांकित औद्योगिक क्षेत्र म्हणून विकसित करण्यासाठी हा मार्ग निर्णायक ठरणार असून कृष्णूर, नायगाव, नरसी, बिलोली परिसरातील शेतकरी, कामगार, महिला, युवक आणि उद्योजकांसाठी रोजगार व गुंतवणुकीच्या नव्या संधी निर्माण होतील.
एकंदरीत, या रेल्वे प्रकल्पांमुळे मराठवाड्यातील उद्योग, व्यापार आणि रोजगार क्षेत्रात मोठी वाढ होऊन आर्थिक विकासाला चालना मिळेल, तसेच सीमाभागातील परिस्थिती अधिक सक्षम होण्यास मदत होईल. हा रेल्वे मार्ग म्हणजे विकासाची नवी दिशा ठरेल, असा विश्वास खासदार गोपछडे यांनी व्यक्त केला.