अमरदीप दगडे (जिल्हा प्रतिनिधी):
बिलोली तालुक्यातील विद्यार्थ्यांचे मानसिक ताण कमी होऊन त्यांची शारीरिक सुदृढता वाढावी, या उद्देशाने जिल्हा परिषद व खाजगी अनुदानित शाळांच्या परिसरात ओपन जिम उभारण्याचा उपक्रम वेगाने राबविण्यात येत आहे. केंद्र शासनाच्या सहकार्याने आणि GAIL India Limited या कंपनीच्या सीएसआर निधीतून हा महत्त्वाकांक्षी उपक्रम हाती घेण्यात आला आहे.
या उपक्रमासाठी राज्यसभेचे खासदार डॉ . अजित गोपछडे यांनी विशेष पुढाकार घेतला असून त्यांच्या प्रयत्नातून बिलोली तालुक्यात सर्वाधिक शाळांमध्ये ओपन जिमची उभारणी करण्यात आली आहे. आतापर्यंत तालुक्यातील एकूण ३८ शाळांमध्ये ओपन जिमचे साहित्य बसविण्याचे काम पूर्ण झाले असून उर्वरित शाळांमध्येही काम प्रगतीपथावर आहे.
शाळांच्या प्रांगणात निसर्गरम्य आणि मोकळ्या वातावरणात विद्यार्थ्यांना व्यायाम करण्याची संधी उपलब्ध व्हावी, तसेच बालवयापासून ते किशोरवयापर्यंतच्या विद्यार्थ्यांना शालेय वेळेतच नियमित व्यायामाची सवय लागावी, हा या उपक्रमामागील मुख्य उद्देश आहे. नियमित व्यायामामुळे विद्यार्थ्यांचे शरीर लवचिक, सुदृढ आणि तंदुरुस्त राहण्यास मदत होणार आहे. भविष्यात हृदयविकार, मधुमेह यांसारख्या आजारांचा धोका कमी व्हावा तसेच विद्यार्थ्यांचे मानसिक व शारीरिक स्वास्थ्य सुधारावे, या व्यापक उद्दिष्टातून हा उपक्रम राबविण्यात येत आहे.
नांदेड जिल्ह्यातील शाळांमध्ये शैक्षणिक तसेच भौतिक सुविधा विकसित करण्यासाठीही विविध उपक्रम राबविण्यात येत असून त्यामध्ये ओपन जिम प्रकल्पाचा महत्त्वाचा समावेश आहे. खासदार डॉ.अजित गोपछडे यांच्या सहकार्याने जिल्ह्यातील अनेक तालुक्यांमध्ये हा प्रकल्प राबविण्यात येत आहे.
या योजनेच्या पहिल्या टप्प्यात नांदेड जिल्ह्यात एकूण १०० शाळांमध्ये ओपन जिम बसविण्याचे नियोजन करण्यात आले आहे. त्यामध्ये बिलोली तालुक्यात ३८, देगलूर तालुक्यात २७, नांदेड तालुक्यात ७, धर्माबाद तालुक्यात ३, मुखेड तालुक्यात २, नायगाव तालुक्यात ४, कंधार तालुक्यात ४, अर्धापूर तालुक्यात १, किनवट तालुक्यात २, हिमायतनगर तालुक्यात १, हदगाव तालुक्यात १, भोकर तालुक्यात १ आणि उमरी तालुक्यात ९ शाळांमध्ये ओपन जिम उभारण्यात येत आहेत.
या ओपन जिमच्या माध्यमातून विद्यार्थ्यांमध्ये व्यायामाची आवड निर्माण होण्यासोबतच त्यांचे शारीरिक व मानसिक आरोग्य सुधारण्यास मोठी मदत होणार आहे. तसेच शाळांमध्ये खेळीमेळीचे, आनंददायी आणि उत्साही वातावरण तयार होण्यासही या उपक्रमाचा फायदा होणार आहे.
या उपक्रमासाठी विशेष प्रयत्न करणारे खासदार गोपछडे यांचे पालकवर्ग आणि नागरिकांकडून आभार व्यक्त करण्यात येत आहेत.