अमरदीप दगडे (जिल्हा प्रतिनिधी) नांदेड:जिल्ह्यात फेब्रुवारी २०२६ ते डिसेंबर २०२६ या कालावधीत कार्यकाळ संपणाऱ्या ग्रामपंचायतींसंदर्भात जिल्हा परिषद नांदेडच्या ग्रामपंचायत विभागाने महत्त्वाचा प्रशासकीय आदेश जारी केला आहे. या आदेशानुसार संबंधित ग्रामपंचायतींमध्ये अधिकाऱ्यांची नियुक्ती न करता सध्या कार्यरत असलेल्या सरपंचांनाच प्रशासक म्हणून नियुक्त करण्यात येणार आहे.
महाराष्ट्र ग्रामपंचायत अधिनियम १९५८ अंतर्गत हा निर्णय घेण्यात आला असून नवीन ग्रामपंचायत निवडणुका होईपर्यंत ग्रामपंचायतींचा कारभार सुरळीत सुरू ठेवण्याचा उद्देश यामागे असल्याचे आदेशात नमूद करण्यात आले आहे.
या निर्णयानुसार, विद्यमान सरपंच प्रशासक म्हणून काम पाहणार असून त्यांना मदत करण्यासाठी उपसरपंच व विद्यमान ग्रामपंचायत सदस्यांची एक समिती स्थापन करण्यात येणार आहे. या समितीला “प्रशासकीय समिती” असे संबोधण्यात येणार असून ग्रामपंचायतीचे दैनंदिन प्रशासन, विकासकामे व नियमित कामकाज पार पाडण्यासाठी आवश्यक सर्व अधिकार या समितीला देण्यात आले आहेत.
प्रशासक म्हणून नियुक्त करण्यात आलेल्या सरपंचांना महाराष्ट्र ग्रामपंचायत अधिनियमातील तरतुदीनुसार सरपंचांचे अधिकार व कर्तव्ये पार पाडण्याचा अधिकार राहणार आहे. तसेच ग्रामपंचायतीचे कामकाज कोणत्याही अडथळ्याशिवाय सुरू राहावे, यासाठी प्रशासकीय समितीमार्फत सर्व निर्णय प्रक्रिया राबविण्यात येणार आहे.
मुख्य कार्यकारी अधिकारी, जिल्हा परिषद नांदेड यांच्या स्वाक्षरीने हा आदेश जारी करण्यात आला असून संबंधित विभागांना त्याची प्रत पाठविण्यात आली आहे. या निर्णयामुळे निवडणुका होईपर्यंत ग्रामपंचायतींचे प्रशासन सातत्याने सुरू राहणार असल्याचे स्पष्ट झाले आहे.