# కాకినాడ జీజీహెచ్‌లో అధునాతన క్యాన్సర్ చికిత్సా కేంద్రం * రూ. 36.6 కోట్లతో రేడియోథెరపీ లీనాక్ యంత్రం * ఏడు జిల్లాల పరిధిలో క్యాన్సర్ రోగులకు ప్రయోజనం * త్వరలో అందుబాటులోకి రానున్న రూ. 3.5 కోట్ల మొబైల్ క్యాన్సర్ స్క్రీనింగ్ వాహనం **కాకినాడ:** కాకినాడ ప్రభుత్వ సర్వజన ఆసుపత్రిలో అధునాతన క్యాన్సర్ చికిత్సా కేంద్రం ఏర్పాటుకు చర్యలు కొనసాగుతున్నాయి. రూ. 36.6 కోట్ల వ్యయంతో అత్యాధునిక డ్యూయల్ ఎనర్జీ లీనియర్ యాక్సిలరేటర్ (LINAC) యంత్రాన్ని ఏర్పాటు చేయనున్నారు. ఈ యంత్రానికి అవసరమైన నిధులను ఒఎన్‌జీసీ సంస్థ సీఎస్ఆర్ నిధుల నుంచి సమకూర్చనున్నట్లు అధికారులు తెలిపారు. దీంతోపాటు సీటీ సిమ్యులేటర్, హెచ్‌డీఆర్ బ్రాకీథెరపీ యంత్రం, డోసిమెట్రీ తదితర పరికరాలను అందుబాటులోకి తీసుకురావడానికి ప్రతిపాదనలు ఉన్నాయి. క్యాన్సర్‌ను ప్రారంభ దశలోనే గుర్తించేందుకు రూ. 3.5 కోట్లతో మొబైల్ క్యాన్సర్ స్క్రీనింగ్ వాహనాన్ని కూడా త్వరలో అందుబాటులోకి తీసుకురానున్నారు. ఇప్పటికే రెడ్‌క్రాస్ నిధులతో చేపట్టిన అధునాతన భవనం నిర్మాణం తుది దశలో ఉంది. ఈ భవనంలో రేడియోథెరపీ బంకర్ ఏర్పాటుకు పూణేలోని అటామిక్ ఎనర్జీ రీసెర్చ్ బోర్డు అనుమతి లభించినట్లు అధికారులు తెలిపారు. ఈ బంకర్‌లో LINAC యంత్రాన్ని ఏర్పాటు చేయనున్నారు. ఈ చికిత్సా కేంద్రం అందుబాటులోకి వస్తే కాకినాడతో పాటు డాక్టర్ బి.ఆర్. అంబేద్కర్ కోనసీమ, తూర్పుగోదావరి, అనకాపల్లి, పోలవరం తదితర ప్రాంతాల క్యాన్సర్ రోగులకు ప్రయోజనం కలగనుంది. ప్రస్తుతం కాకినాడ సర్వజన ఆసుపత్రి క్యాన్సర్ రిఫరల్ కేంద్రంగా సేవలు అందిస్తోంది. ఆధునిక రేడియోథెరపీ సదుపాయాలు అందుబాటులో లేకపోవడంతో కొంతమంది రోగులు హైదరాబాద్, చెన్నై, విశాఖపట్నం వంటి నగరాలకు చికిత్స కోసం వెళ్లాల్సి వస్తోంది. LINAC యంత్రం అందుబాటులోకి వస్తే రేడియోథెరపీ సేవలను స్థానికంగానే అందించే అవకాశం ఏర్పడుతుంది. ప్రస్తుతం ఆసుపత్రిలో ఆంకాలజీ విభాగంలో ప్రొఫెసర్, అసోసియేట్ ప్రొఫెసర్, ఇద్దరు అసిస్టెంట్ ప్రొఫెసర్లు, సీనియర్ రెసిడెంట్, రేడియేషన్ సేఫ్టీ ఆఫీసర్‌తో పాటు జూనియర్ రెసిడెంట్లు సేవలు అందిస్తున్నారు. కాకినాడ జీజీహెచ్‌లో క్యాన్సర్ చికిత్సా సదుపాయాల అభివృద్ధికి కేంద్ర, రాష్ట్ర ప్రభుత్వ సంస్థలు, ఒఎన్‌జీసీ, రెడ్‌క్రాస్ తదితర సంస్థల సహకారం అందిస్తున్నట్లు సంబంధిత వర్గాలు తెలిపాయి. అధునాతన పరికరాలు, మౌలిక వసతులు అందుబాటులోకి వస్తే కాకినాడ ప్రాంతంలో క్యాన్సర్ వైద్య సేవలు మరింత విస్తరించే అవకాశం ఉంది.