சென்னை: பாமக நிறுவனர் டாக்டர் ராமதாஸ் மற்றும் கட்சித் தலைவர் அன்புமணி ராமதாஸ் ஆகியோருக்கு இடையே கடந்த சில ஆண்டுகளாக கருத்து வேறுபாடுகள் நிலவி வந்த நிலையில், ராமதாஸ் – சரஸ்வதி தம்பதியரின் 61வது திருமண நாளை முன்னிட்டு நடைபெற்ற சந்திப்பு அரசியல் வட்டாரங்களில் கவனம் பெற்றுள்ளது.

இந்த நிகழ்வையொட்டி, அன்புமணி ராமதாஸ் தனது குடும்பத்தினருடன் தைலாபுரம் சென்று ராமதாஸை சந்தித்து வாழ்த்து தெரிவித்ததுடன், அவரது ஆசீர்வாதத்தையும் பெற்றார்.

அன்புமணியின் வருகையின்போது அவருக்கு வரவேற்பு அளிக்கப்பட்டது. பின்னர் ராமதாஸ் மற்றும் அன்புமணி குடும்பத்தினர் ஒன்றாக சந்தித்து உரையாடினர். அன்புமணி மற்றும் சௌமியா அன்புமணி ஆகியோர் ராமதாஸ் – சரஸ்வதி தம்பதியரிடம் ஆசீர்வாதம் பெற்றனர்.

இந்த சந்திப்பு தொடர்பான புகைப்படங்கள் சமூக வலைதளங்களில் பரவலாக பகிரப்பட்டு வருகின்றன. நீண்ட இடைவெளிக்குப் பிறகு இரு தரப்பினரும் ஒன்றாக சந்தித்திருப்பது பாமக நிர்வாகிகள் மற்றும் தொண்டர்கள் மத்தியில் வரவேற்பைப் பெற்றுள்ளது.

சந்திப்புக்குப் பின்னர் செய்தியாளர்களிடம் பேசிய ராமதாஸ், “இனி நல்லது நடக்கும்” என்று தெரிவித்தார்.

இந்த சந்திப்பு பாமக அரசியல் மற்றும் கட்சியின் எதிர்கால நடவடிக்கைகள் குறித்து பல்வேறு விவாதங்களை ஏற்படுத்தியுள்ளது. இருப்பினும், கட்சியின் அடுத்தகட்ட முடிவுகள் குறித்து அதிகாரப்பூர்வ அறிவிப்புகள் எதுவும் வெளியாகவில்லை.