અમદાવાદ:
ગુજરાતભરમાં આજે મેઘરાજાએ ધમાકેદાર બેટિંગ કરતા અનેક વિસ્તારોમાં જળબંબાકારની સ્થિતિ સર્જાઈ છે. ખાસ કરીને અમદાવાદ શહેરમાં મુશળધાર વરસાદને કારણે નીચાણવાળા વિસ્તારો અને મુખ્ય માર્ગો પાણીમાં ગરકાવ થઈ ગયા હતા. રસ્તાઓ પર પાણી ભરાઈ જવાથી શહેરભરમાં વાહનોની લાંબી લાઈનો લાગી હતી અને ઠેર-ઠેર ટ્રાફિક જામની વિકટ સમસ્યા સર્જાઈ હતી, જેના કારણે વાહનચાલકો ભારે મુશ્કેલીમાં મુકાયા હતા.
આવી મુશ્કેલ પરિસ્થિતિ વચ્ચે અમદાવાદના ઘાટલોડિયા વિસ્તારમાંથી માનવતા અને સેવાભાવનું ઉત્તમ ઉદાહરણ જોવા મળ્યું છે. ઘાટલોડિયાના મુખ્ય એવા પાટીદાર ચોક અને ચાણક્યપુરી વિસ્તારમાં ટ્રાફિકની ગંભીર સમસ્યા ઉભી થતાં સ્થાનિક સામાજિક કાર્યકરો સ્વયંભૂ રસ્તા પર ઉતરી આવ્યા હતા.
પોલીસ તંત્રની મદદ અર્થે આ સામાજિક કાર્યકરોએ ધોધમાર વરસાદમાં પણ સતત ઊભા રહીને પાટીદાર ચોક પર ટ્રાફિકનું સુચારુ સંચાલન કર્યું હતું. તેમણે બંધ પડી ગયેલા વાહનોને ખસેડવામાં મદદ કરી હતી અને વાહનોની અવરજવર શિસ્તબદ્ધ કરાવીને ટ્રાફિક હળવો કર્યો હતો. ભારે વરસાદની આફત વચ્ચે પાટીદાર ચોક ખાતે સામાજિક કાર્યકરોના આ ઉત્કૃષ્ટ પ્રયાસોથી વાહનચાલકોએ ભારે રાહત અનુભવી હતી અને સમગ્ર વિસ્તારમાં લોકોએ તેમની આ સેવાને બિરદાવી હતી.