రాయికల్:
జగిత్యాల జిల్లాలో నవోదయ పాఠశాల మరియు కేంద్రీయ విద్యాలయాల ఏర్పాటుకు రాష్ట్ర ప్రభుత్వం వెంటనే స్థలం కేటాయించాలని జగిత్యాల బీజేపీ నియోజకవర్గ ఇంచార్జి డాక్టర్ భోగ శ్రావణి కోరారు.
బుధవారం రాయికల్ పట్టణంలో నిర్వహించిన విలేకరుల సమావేశంలో ఆమె మాట్లాడుతూ, కేంద్ర ప్రభుత్వం నవోదయ పాఠశాలలు మరియు కేంద్రీయ విద్యాలయాల మంజూరుకు సానుకూలంగా స్పందించినప్పటికీ, స్థల కేటాయింపులో ఆలస్యం జరుగుతోందని అన్నారు.
జగిత్యాల నియోజకవర్గంలో కేంద్రీయ విద్యాలయం ఏర్పాటు విషయమై ఎంపీ ధర్మపురి అరవింద్ కేంద్ర స్థాయిలో చర్యలు తీసుకున్నారని ఆమె పేర్కొన్నారు. అయితే, స్థల కేటాయింపు ప్రక్రియ పూర్తికాకపోవడంతో విద్యార్థులు ఇబ్బందులు ఎదుర్కొంటున్నారని తెలిపారు.
కోరుట్ల నియోజకవర్గంలో ఇప్పటికే నవోదయ పాఠశాల ప్రారంభమై అడ్మిషన్లు కొనసాగుతున్నాయని, జగిత్యాలలో కూడా సమయానికి స్థలం కేటాయిస్తే విద్యార్థులకు ఉపయోగకరంగా ఉండేదని అన్నారు.
ఈ నెల 15వ తేదీలోపు రాష్ట్ర ప్రభుత్వం స్థలం కేటాయించాలని డిమాండ్ చేస్తూ, స్పందన రాకపోతే జిల్లా కేంద్రంలో నిరాహార దీక్ష చేపట్టనున్నట్లు తెలిపారు.
ఈ సమావేశంలో బీజేపీ నాయకులు, ప్రజాప్రతినిధులు మరియు కార్యకర్తలు పాల్గొన్నారు.
