कोल्हापूर: (17.09.2026)
शासकीय योजनांची माहिती तळागाळातील नागरिकांपर्यंत पोहोचवून अधिकाधिक लाभार्थ्यांना त्याचा थेट लाभ मिळवून द्यावा. प्रशासनाने लोकोपयोगी कामांना प्राधान्य देऊन कोल्हापूर जिल्ह्यात ‘सेवा संकल्प अभियान’ यशस्वीपणे राबवावे, असे आवाहन जिल्हाधिकारी डॉ. विजय राठोड यांनी केले.
पंतप्रधान नरेंद्र मोदी यांच्या संवैधानिक पदावरील कारकिर्दीला २५ वर्षे पूर्ण होत असल्याच्या पार्श्वभूमीवर, ‘सेवा परमो धर्म:’ या भावनेतून राज्यात १७ सप्टेंबर ते १७ ऑक्टोबर या कालावधीत हे विशेष अभियान राबवले जात आहे. या अभियानाच्या पूर्वतयारीचा आढावा घेण्यासाठी जिल्हाधिकारी कार्यालयातील शाहूजी सभागृहात नियोजन बैठक पार पडली. बैठकीस निवासी उपजिल्हाधिकारी गजानन गुरव, जिल्हा परिषदेचे अतिरिक्त मुख्य कार्यकारी अधिकारी संतोष जोशी यांच्यासह विविध विभागांचे अधिकारी प्रत्यक्ष व दूरदृश्यप्रणालीद्वारे उपस्थित होते.
प्रशासनाला प्रमुख सूचना व कामांची रूपरेषा:
अतिक्रमण नियमregularization: २०११ पर्यंत शासकीय जमिनीवरील रहिवासी अतिक्रमणे नियमानुकूल करण्याची आवश्यक प्रक्रिया तातडीने पूर्ण करावी.
आरोग्य व पर्यावरण: १ ऑक्टोबरपर्यंत विशेष स्वच्छता मोहीम राबवावी. तसेच ३०० कोटी वृक्ष लागवड, नागरिकांची आरोग्य तपासणी आणि अवयवदान अर्जांची नोंदणी गतिमान करावी.
कृषी व पायाभूत सुविधा: बळीराजा शेत व पाणंद रस्त्यांची कामे मार्गी लावावीत तसेच शेतकऱ्यांची 'ॲग्रीस्टॅक' नोंदणी वेळेत पूर्ण करावी.
जनजागृती व शिक्षण: योजनांच्या यशोगाथांची प्रसिद्धी, सार्वजनिक ठिकाणी रांगोळी सादरीकरण, कलापथकांद्वारे जनजागृती आणि "चला शाळेत जाऊया" उपक्रमांतर्गत शाळांच्या गुणवत्तेची पाहणी करावी.
यावेळी जिल्हा माहिती अधिकारी वर्षा पाटोळे यांनी अभियानाचे सादरीकरण केले. महिनाभराच्या या मोहिमेत सेवा सेतू, इनोव्हेशन चॅलेंज, विकसित भारत संकल्प यात्रा, अंगणवाडी उत्सव, सेवाज्योत यात्रा आणि जनसेवक महाकुंभ यांसारखे विविध लोककल्याणकारी कार्यक्रम राबवले जाणार आहेत. कोल्हापूर जिल्हा या अभियानात राज्यात अग्रेसर असून देशातही अव्वल ठरेल या दृष्टीने काम करण्याचे निर्देश जिल्हाधिकाऱ्यांनी दिले.