मुंबईसह पालघर जिल्ह्यात सुरू असलेल्या मुसळधार पावसामुळे पश्चिम रेल्वेच्या डहाणू ते विरार दरम्यानची लोकल रेल्वे सेवा पूर्णपणे विस्कळीत झाली असून, काही ठिकाणी सेवा बंद ठेवण्यात आल्याची माहिती समोर येत आहे. सततच्या पावसामुळे रेल्वे रुळांवर पाणी साचल्याने आणि प्रवाशांच्या सुरक्षिततेचा विचार करून रेल्वे प्रशासनाने आवश्यक ती खबरदारी घेतली आहे.
लोकल सेवा ठप्प झाल्यामुळे डहाणू, सफाळे, पालघर, बोईसर, वसई, नालासोपारा आणि विरार परिसरातील हजारो प्रवाशांचे मोठे हाल होत आहेत. कार्यालयीन वेळेत कामावर जाणाऱ्या नागरिकांना पर्यायी वाहतुकीचा आधार घ्यावा लागत असून, बसस्थानके आणि रिक्षा स्थानकांवर मोठी गर्दी पाहायला मिळत आहे.
हवामान विभागाने पुढील काही तास मुसळधार ते अतिमुसळधार पावसाचा इशारा दिला असून, नागरिकांनी अत्यावश्यक कामाशिवाय घराबाहेर पडू नये, असे आवाहन करण्यात आले आहे. तसेच, रेल्वे प्रशासनाकडून वेळोवेळी जाहीर करण्यात येणाऱ्या अधिकृत सूचनांकडे लक्ष ठेवण्याचेही आवाहन करण्यात आले आहे.
पावसाचा जोर कमी झाल्यानंतर रेल्वे मार्गांची तपासणी करून लोकल सेवा पूर्ववत करण्यासाठी युद्धपातळीवर प्रयत्न सुरू करण्यात येणार असल्याची माहिती मिळत आहे. मुसळधार पावसामुळे जनजीवन विस्कळीत झाले असून, नागरिकांनी सुरक्षिततेला प्राधान्य द्यावे, असे प्रशासनाकडून सांगण्यात येत आहे.indian press union Prithiviraj patel Thane Maharashtra